Si të mbash buxhetin e familjes pa tabela

Përditësuar: 8 tetor 2026

Shumica e njerëzve nuk kanë nevojë për tabela të ndërlikuara. Mjafton të dinë tri gjëra: sa vjen, sa shkon me siguri, dhe sa mbetet për pjesën tjetër të muajit.

1. Fillo nga ajo që vjen

Rroga, pensioni, paratë nga jashtë. Shëno shumën dhe ditën kur vijnë. Ky është kufiri i muajit.

2. Hiq faturat që vijnë me siguri

Qiraja ose kësti i kredisë, dritat, uji, interneti, telefoni. Edhe kur shuma ndryshon pak, e di afërsisht sa është. Hiqi që në fillim të muajit, si të ishin paguar tashmë.

3. Mos harro ato që vijnë një herë në vit

Sigurimi i makinës, kolaudimi, taksa vjetore, taksa e pronës. Janë ato që prishin muajin kur vijnë. Ndaji në muaj: nëse bashkë kushtojnë 24.000 lekë në vit, lër mënjanë 2.000 lekë çdo muaj.

4. Shëno shpenzimet e përditshme

Ushqimet, kafeja, karburanti, transporti. Nuk ka nevojë të jesh perfekt: edhe nëse shënon shumicën, në fund të muajit e sheh qartë ku shkuan paratë.

5. Kujdes me keshin

Kur tërheq para nga ATM-ja, ato ende nuk janë shpenzuar: kanë kaluar nga banka në portofol. Shpenzim bëhen kur i harxhon. Në fund të muajit, numëro sa kesh të ka mbetur: diferenca është ajo që shpenzove pa e shënuar.

6. Shiko muajin, jo ditën

Një ditë e shtrenjtë nuk do të thotë asgjë. Rëndësi ka nëse në fund të muajit të mbeten para, dhe nëse kjo shifër rritet nga muaji në muaj.